Erindi Skiptidagar - nesti handa nýrri kynslóð. Guðrún Nordal forstöðumaður Árnastofnunar spjallar um efnistök í bók sinni með sama nafni. Nýjar kynslóðir horfa inn í framtíð sem verður gjörólík okkar samtíma. Hvaða nesti – minningar, sögur og reynslu – munu þær taka með sér úr sagnasjóði fortíðarinnar? Skiptidagar er persónulegt ferðalag höfundar um sögu Íslands og bókmenntir allt frá landnámi til okkar daga. Þar er spurt hvaða lærdóm við getum dregið af frásögnum aldanna um okkur sjálf og hvernig við getum miðlað þeim á nýrri öld. Höfundur leggur áherslu á sögur kvenna á öllum tímum – og sækir alltaf samanburð til nútímans til að sýna að sagan er ein og allt tengist.

Staður og stund: Hæðargarður 31, þriðjudag 19.febrúar kl. 16:30-18. SKRÁ MIG HÉR. Allir velkomnir, aðgangur er kr. 500 sem greiðist í reiðufé við innganginn.

Guðrún Nordal er forstöðumaður Árnastofnunar og prófessor við Háskóla Íslands. Hún hefur unnið að rannsóknum á íslenskum miðaldabókmenntum í þrjátíu ár, og um árabil vann hún að mótun vísindastefnu hérlendis og á norrænum vettvangi. Í bókinni fléttast þessi hugðarefni hennar saman.